Nanawagan si Sen. Panfilo “Ping” M. Lacson nitong Martes sa publiko na manatiling mapagmatyag matapos magtipon ang Senado bilang impeachment court noong Lunes para sa kaso ni Vice President Sara Duterte-Carpio.
Inilarawan ni Lacson ang pagtipon ng Senado bilang “breath of fresh air,” kumpara sa tensyonadong mga pangyayari noong nakaraang linggo, kabilang ang insidente ng pamamaril sa gusali ng Senado.
“The stark contrast between the smell of gunpowder last week and the breath of fresh air in the Senate yesterday was evident when we convened as an impeachment court after all the parliamentary procedures were strictly followed. May the public vigilance remain unabated,” aniya sa X.
Noong Lunes, pormal na nagtipon ang Senado bilang impeachment court upang litisin ang kaso laban sa Pangalawang Pangulo, matapos nitong matanggap ang Articles of Impeachment mula sa House of Representatives noong Mayo 13.
Dinala sa Senado ang Articles of Impeachment kasabay ng tensyon kaugnay sa umano’y posibleng pag-aresto kay Sen. Ronald dela Rosa.
Noong nakaraang weekend, binigyang-diin din ni Lacson na may hangganan ang pag-abuso sa kapangyarihan, kasunod ng mga pangyayari noong nakaraang linggo.
“Arrogance of power, like impunity, has its limits,” aniya.